13 ოქტომბერს კავკასიის ახალგაზრდულმა კავშირმა პროექტ „ACT”-ის ფარგლებში მონაწილეობა მიიღო ფესტივალში Tbilisi Park Fest დიღმის ტყე პარკში და პარკში მოსულ სტუმრებს მრავალი საინტერესო და განსხვავებული ვორქშოფები შევთავაზეთ.
დღე სახალისო ვიქტორინით დავიწყეთ. ბავშვებს კითხვები დავუსვით ეკოლოგიურ და მშვიდობის თემებზე და გამარჯვებულებიც გამოვავლინეთ, რომლებსაც „ACT”-ის ბრენდირებული საჩუქრები გადავეცით.
ამის შემდეგ უფრო შემოქმედებით ნაწილზე გადავედით და მონაწილეებს გავაცანით მონაწილეობრივი ხელოვნების პრინციპები, შემდეგ დავყავით ორ ჯგუფად და თითოეულმა მათგანმა გააკეთა ორი დიდი კოლაჟი თემაზე „მე და ჩემი მეგობრები“.
ამასობაში „გრაფიტი საქართველოს“ კუთხეში ჩვენმა მხატვარმა საღებავების ჩანთას თავი გაუხსნა და ხატვას შეუდგა. თანდათან უფრო და უფრო მეტი ადამიანის ყურადღებას იქცევდა მისი შემოქმედება და ბოლოს უკვე თავადაც ჩაერთვნენ ნახატების შეღებვაში. საბოლოოდ კი ორი მშვენიერი გრაფიტი შეიქმნა ერთობლივი ძალისხმევით.
სცენაზე ამ დროს ჩვენი მომღერალი სიმღერას ასრულებდა ფესტივალის მონაწილეებისთვის, რის შემდეგაც ჩვენთან გადმოინაცვლა და მცირე ვორქშოფი ჩაატარა მუსიკის თემაზე და ბავშვებთან ერთად რამდენიმე სიმღერაც შეასრულა.
ბოლო ვორქშოფი ჩვენი სოციალური მეწარმეობის კონკურსის გამარჯვებულებმა ჩაატარეს ხელოვნებასა და ხელნაკეთ ნივთებზე. სხვადასხვა ასაკის მონაწილეები დიდი მონდომებით ამზადებდა ფერად აქსესუარებს თავისთვის და საყვარელი ადამიანებისთვის. ჯამში ყველა ვორქშოფს დაახლოებით ას ორმოცდაათამდე 8-25 წლის ახალგაზრდა დაესწრო.
კავკასიის ახალგაზრდული კავშირი მადლობას უხდის „Funday Entertainment“-ს და შვიდი სხვა პარტნიორ ორგანიზაციას ამ არაჩვეულებრივი ფესტივალის ორგანიზებისთვის. ჩვენ იმედს ვიტოვებთ რომ მომავალშიც არაერთ მსგავს ღონისძიებას ჩავატარებთ ერთად.
